Ці можна ў Беларусі ўсынавіць дзіця, калі вы не ў стасунках?
Што рабіць, калі адзінокая жанчына або мужчына прынялі рашэнне выхоўваць дзіця самастойна? Тлумачыць юрыстка Алена Кагарліцкая.
16.07.2018 / 10:31
«Беларускае заканадаўства прадугледжвае магчымасць усынаўляць дзяцей дзеяздольнымі асобамі, якія знаходзяцца ў шлюбе, так і адзінокімі асобамі абодвух палоў», — кажа яна.
То бок, калі вы жывяце адзін, то вы смела можаце ўсынаўляць дзіця пры выкананні наступных патрабаванняў.
Адзінокі чалавек можа ўсынавіць дзіця, калі ён:
- не хворы на хранічны алкагалізм, наркаманію, таксікаманію;
- не пазбаўлены бацькоўскіх правоў;
- не з'яўляецца былым усынавіцелем, калі ўсынаўленне было адменена праз неналежнае выкананне ўсынавіцелем сваіх абавязкаў;
- не з'яўляецца асобай, адхіленай ад абавязкаў апекуна або папячыцеля за неналежнае выкананне ўскладзеных на яго абавязкаў;
- не мае судзімасць за наўмысныя злачынствы, а таксама не асуджаўся за наўмысныя цяжкiя або асаблiва цяжкiя злачынствы супраць чалавека;
- не з'яўляецца асобай, дзеці якога былі прызнаныя тымі, хто мае патрэбу ў дзяржаўнай абароне ў сувязi з невыкананнем або неналежным выкананнем гэтымi асобамi сваiх абавязкаў па выхаванні і ўтрыманні дзяцей;
- мае пастаяннае месца жыхарства, а таксама жылое памяшканне, якое адпавядае вызачаным санітарным і тэхнічным патрабаванням;
- на момант усынаўлення мае прыбытак, які забяспечвае дзіця пражытачным мінімумам.
Акрамя названых патрабаванняў, таксама прымаецца пад увагу ўзрост усынавіцеля.
Розніца ва ўзросце паміж усынавіцелем і дзіцём павінна складаць ад 16 да 45 гадоў.
Выключэнне можа быць зроблена судом толькі па прычыне, прызнанай уважлівай: калі дзіця прывязанае да асобы, якая жадае яго ўсынавіць, лічыць яго сваім бацькам ці маці.
У тым выпадку, калі на ўсынаўленне аднаго і таго ж дзіцяці прэтэндуюць асобы, якія не знаходзяцца паміж сабой у шлюбе, то ім адмовяць на сумеснае ўсынаўленне такога дзіцяці.
«Паўтаруся, што згодна з заканадаўствам, усынавіцелем можа быць як адзінокая жанчына, так і адзінокі мужчына. Аднак на практыцы да адзінокіх усынавіцеляў-мужчын органы апекі ставяцца вельмі насцярожана, старанна вывучаюць матывы ўсынаўлення і абстаноўку ў доме кандыдата ва ўсынавіцелі», — кажа юрыст.
Адзінокаму мужчыне давядзецца чымсьці тлумачыць сваю любоў да дзяцей і даказваць, што ён зможа даць рады бацькоўскім абавязкам не горш за жанчыну.
Згодна з Палажэннем аб парадку перадачы дзяцей на ўсынаўленне, кандыдаты ва ўсынавіцелі могуць атрымаць інфармацыю аб працэдуры ўсынаўлення і пераліку дакументаў, неабходных для ўсынаўлення ў аддзеле адукацыі па месцы свайго жыхарства або ў Нацыянальным цэнтры ўсынаўлення (г. Мінск, вул. Платонава, 22).
Падрабязная паслядоўнасць дзеянняў па ўсынаўленню дзіцяці выкладзена на сайце Нацыянальнага цэнтра ўсынаўлення Міністэрства адукацыі Беларусь.