Журналістку «Новага Часу» Дзіяну Серадзюк аштрафавалі на 490 рублёў за асвятленне акцыі салідарнасці
Суд Цэнтральнага раёна Мінска 22 снежня разгледзеў адміністрацыйныя справы ўдзельнікаў акцыі з папяровымі караблікамі каля Расійскай амбасады. Сярод фігурантаў — журналістка газеты «Новы Час» Дзіяна Серадзюк. Журналістку за асвятленне акцыі пакаралі штрафам у памеры 20 базавых велічынь.
22.12.2018 / 13:54
Журналістка газеты «Новы Час» Дзіяна Серадзюк.
Суддзя Іван Касцян, нягледзячы на ўсе аргументы з боку журналісткі Дзіяны Серадзюк і рэдакцыі «Новага Часу», палічыў, што Серадзюк удзельнічала ў акцыі, а не асвятляла яе і пакараў журналістку штрафам у памеры 20 базавых велічынь (490 рублёў).
Нагадаем, вечарам 26 лістапада да амбасады Расіі ў Мінску прыйшло каля дзесяці чалавек, пераважна з «Моладзі БНФ», якія ўсклалі на парапет агароджы папяровыя караблікі, афарбаваныя ў колеры ўкраінскага сцяга. Гэта была акцыя салідарнасці з украінскімі маракамі, абстралянымі і захопленымі ў палон у Азоўскім моры.
Акцыю асвятляла журналістка газеты «Новы Час» Дзіяна Серадзюк, але і яе міліцыянты палічылі ўдзельніцай. Зазначым, што на акцыі прысутнічалі журналісты іншых выданняў, да іх міліцыя прэтэнзій не выказвала.
«Супрацоўнікі Цэнтральнага РАУС палічылі, што я не асвятляла акцыю Моладзь БНФ па ўскладанні караблікаў да Расійскай амбасады ў якасці журналіста, а прымала ў ёй удзел. Нават пратакол даслалі»,
— напісала Дзіяна Серадзюк у фэйсбуку.