Віцяблянка Паліна Ігнацьева-Крук выйграла ў знаўцаў «Што? Дзе? Калі?» 401 тысячу расійскіх рублёў, або 5820 даляраў, паведамляе Tut.by. Фінал года выйшаў у эфір «Першага канала» ў ноч з 23 на 24 снежня.

Паліна задала пытанне аб англійскай карыкатуры XIX стагоддзя, прысвечанай Расіі. На ёй ёсць рускі мядзведзь, рускі казак, рускі мужык, рускі пасол і Аляксандр I. Знаўцам трэба было зразумець: як аўтар карыкатуры назваў цэнтральнага персанажа ў верхнім шэрагу?

Знаўцы адказалі «французскі салдат». Правільны адказ быў іншым - «рускі мароз».

У эфіры АНТ гульню знаўцаў супраць віцяблянкі і іншых тэлегледачоў можна будзе ўбачыць 30 снежня.

Пытанні Паліны Ігнацьевай-Крук як мінімум восем разоў гулялі ў беларускім «Што? Дзе? Калі?». Чатыры разы яна выйгравала, а яшчэ чатыры разы — саступала знаўцам.

Tut.by