Арцыбіскуп Тадэвуш Кандрусевіч накіраваў адкрыты ліст старшыні Палаты прадстаўнікоў Уладзіміру Андрэйчанку і міністру аховы здароўя Валерыю Малашку. Кандрусевіч заявіў, што Каталіцкі касцёл выступае супраць таго, каб фінансаваць першую спробу экстракарпаральнага апладнення (ЭКА) за кошт бюджэту і назваў 9 аргументаў.
1. Вучэнне Каталіцкага касцёла выступае супраць ЭКА, таму што «гэтая працэдура парушае святасць акту зачацця, як гэта задумана Створцам». Зачацце становіцца вынікам супрацоўніцтва паміж жанчынай і ўрачом, і гэта наносіць удар па айцоўству, таму што бацька фактычна аказваецца выключаным з працэсу зачацця свайго дзіцяці.
2. Працэдура ЭКА немагчымая без знішчэння эмбрыёнаў, кожны з якіх мае такое ж права на жыццё, адзначае Кандрусевіч.
3. ЭКА — гэта велізарны бізнес на чалавечай бядзе, мяркуе арцыбіскуп.
«Таму прадстаўнікамі гэтага бізнесу і звязанымі з імі медыцынскімі структурамі замоўчваюцца цяжкія, часам катастрафічныя наступствы гэтай працэдуры для жанчыны, а таксама дадзеныя аб слабым здароўі, а часам інваліднасці дзяцей, зачатых такім ненатуральным чынам», — піша Кандрусевіч.
4. Таксама ўзнікае вялікае пытанне аб тым, ці змогуць дзеці, зачатыя пры дапамозе гэтай працэдуры, самастойна стаць бацькамі, адзначае кіраўнік Каталіцкага касцёла ў Беларусі.
5. ЭКА адкрывае шырокія магчымасці для сурагатнага мацярынства і гандлю дзецьмі, мяркуе Кандрусевіч.
6. «Фінансаванне гэтай бесчалавечнай працэдуры за кошт бюджэту робіць нас усіх адказнымі за гэтае зло, з чым мы не можам пагадзіцца»,
— піша арцыбіскуп.
7. ЭКА стала адпраўным пунктам для генетычнай інжынерыі, кланавання, прэ-імплантацыйных генетычных дыягназаў (адсяванне эмбрыёнаў), збору ствалавых клетак эмбрыёнаў, даследаванняў па дзецях ад трох бацькоў і гібрыдах чалавека і жывёл.
8. Кандрусевіч адзначае, што дзіця — гэта не рэч, права валодання якой даецца бацькам.
«Ніхто не можа патрабаваць для сябе такіх правоў. Бясплоддзе — гэта вялікі цяжар і суровае выпрабаванне для сужонкаў, але чалавечая годнасць не можа быць прынесена ў ахвяру дзеля мэты валодання дзіцем».
9. Для бяздзетных сужонкаў заўсёды застаюцца актуальнымі ўсынаўленне, патранатнае выхаванне або іншыя формы дапамогі дзецям, якія засталіся без апекі бацькоў (у беларускіх дамах-інтэрнатах знаходзяцца 3,4 тысячы дзяцей-сірот, пазбаўленых бацькоўскай апекі), адзначае Тадэвуш Кандрусевіч.