Праект партала
Тое-сёе Ездзіць на Ferrari, піша песні, працуе на бацьку. Чым займаюцца дзеці беларускіх селебрыці1
28.06.2020 / 15:37

Грае ў тэатры ў Латвіі, стварае відэагульні, вучыцца ў раскошным Манака… «Наша Ніна» паглядзела, як склаўся лёс дзяцей беларускіх селебрыці.

Адэля Вольская

22-гадовая дачка Лявона Вольскага таксама спявачка. У 2017-м яна выпусціла свой першы альбом.

«Што да параўнанняў з бацькам, то ў нас з ім зусім розныя тэмы. Ён піша пра публічнае: грамадскія з’явы, палітыку тую ж. Я ж накіраваная ўнутр сябе, пішу пра асабістыя перажыванні», — дзялілася яна ў інтэрв’ю «Нашай Ніне».

Адэля скончыла 23-ю беларускамоўную гімназію ў Мінску, Коласаўскі ліцэй. Вышэйшую адукацыю атрымлівала ва ўніверсітэце Марыі Кюры-Складоўскай (Люблін) па спецыяльнасці «арганізатар мерапрыемстваў». Цяпер вучыцца там у магістратуры. Але Польшча блізкай для дзяўчыны не стала.

«Я б усё аддала, каб застацца цяпер ужо назаўсёды ў Мінску. Многія кажуць, што гэта бессэнсоўна, бо тут няма чаго рабіць, і я з імі часткова згодная. Сама часам прытрымлівалася такога ж меркавання. Але ўсё ж Беларусь мне нашмат бліжэйшая па духу, чым гэтая Польшча, ад якой мяне ванітуе», — эмацыйна выказвалася ў сацсетках Адэля.

Павел Міхалок

У свае 25 сын Сяргея Міхалка паспеў ажаніцца і развесціся, пажыць у Маскве і вярнуцца ў Мінск.

Вышэйшую адукацыю Павел не атрымаў. Паступаў у Інстытут сучасных ведаў імя Шырокава, на прадзюсарскі факультэт, але кінуў, не скончыўшы першага курса.

Пасля разводу бацькоў хлопец жыў з маці і айчымам, але часта ездзіў з татам на гастролі. Два гады таму стаў выступаць з Сяргеем — Павел клавішнік у гурце Drezden. Раней ён граў у пост-панк-гурце Super Besse і ездзіў з імі па еўрапейскіх музычных пляцоўках.

Юлія Айплатава

Дачка вядомага дызайнера Івана Айплатава пайшла па слядах бацькі. Летась дзяўчына скончыла Акадэмію мастацтваў, факультэт дызайну і дэкаратыўна-прыкладнога мастацтва. 

З першага курса яна працуе ў бацькавай студыі. Тлумачыла, што хоча набрацца вопыту, перш чым ствараць штосьці сваё.

«Ці строгі крытык тата? Я часам, шчыра кажучы, не магу зразумець яго рэакцыю. Мне хочацца, каб, калі я нешта крутое прыдумала, ён усклікнуў: о, класна! А ён: так, добра. Потым мама расказвае, што ён мяне пахваліў. Канечне, гэта вельмі дапамагае, калі побач ёсць такі дасведчаны чалавек», — дзялілася яна падчас абароны дыплому.

Ігнат Бандарчук

Сыну Ганны Бонд 20 год. Спачатку ён паступіў у музычны каледж, але пасля вырашыў быць бізнэсоўцам, а не піяністам. Цяпер хлопец жыве ў Манака і вучыцца продажам у тамтэйшым універсітэце.

Ігнат ведае ангельскую мову, крыху французскую і італьянскую. Цікавіцца крыптавалютамі, гандлюе на біржы, чытае бізнэс-літаратуру. Запісвае таксама анлайн-семінары пра асабісты рост і пра тое, як зарабляць на перапродажы моднага адзення.

Сам хлопец любіць брэндавыя рэчы і раскошу. Носіць сумку Gucci, ездзіць на Ferrari, выходзіць з крам з пакункамі Philipp Plein i Louis Vuitton.

У сацсетках выкладае сумесныя фота з расійскімі зоркамі — Іванам Ургантам, Філіпам Кіркоравым, Рыгорам Лепсам.

Ганна Бонд расказвала раней у інтэрв’ю, што сын добры да непрыстойнасці і вельмі інтэлігентны.

Аляксандр і Антон Саладухі

Сынам-двайнятам Аляксандра Саладухі па 32 гады. Антон скончыў Інстытут сучасных ведаў імя Шырокава, Аляксандр — філіял Маскоўскага інстытута інфарматыкі.

Аляксандр Саладуха

Зарабляць хлопцы спрабавалі па-рознаму. Грузілі кавуны на рынку, працавалі на складзе фірмы, якая прадавала запчасткі. Антон нейкі час гандляваў духамі. Шмат год сыны працуюць у камандзе бацькі — кіроўцам і гукарэжысёрам, плюс займаюцца арганізацыяй канцэртаў.

Антон Саладуха

Антон і Аляксандр і самі выступалі на сцэне — у дуэце «Элемент». Гастралявалі разам з бацькам па гарадах Беларусі, Расіі, Украіны. Запісалі два альбомы. Але ўласную аўдыторыю не займелі. У адным з інтэрв’ю Антон згадваў, як яны спрабавалі зладзіць сольны канцэрт у Валожыне, але раскупілі толькі тры квіткі.

Хлопцы жанатыя. У Антона дзве дачкі. Аляксандр першы раз стаў татам усяго месяц таму — таксама дачка. З нагоды нараджэння ўнучкі Аляксандр Саладуха падарыў сыну аўтамабіль.

Іван Стральцоў

У акцёры пайшоў сын спявачкі Іны Афанасьевай, які цяпер жыве ў Латвіі. Іван скончыў Акадэмію мастацтваў — вучыўся на курсе прымы Купалаўскага Зоі Белахвосцік. Раней яго можна было ўбачыць на сцэне Тэатра імя Горкага ў Мінску, а з мінулага года хлопец грае ў Рыжскім рускім тэатры імя М. Чэхава. 

У Івана ёсць жонка і маленькая дачка Вара. Жонка Юлія Вярхоўская таксама беларуская актрыса, здымаецца ў кіно і серыялах. Летась прыгажуня была сярод фіналістак, якія змагаліся за права прадставіць Беларусь на конкурсе «Місіс свету».

Цікава, што ў сацыяльных сетках акцёр посціць не толькі лірычныя назіранні і фоты любімай сям’і, але і верш Ганны Севярынец пра Колю, эксперымент блогераў па зборы подпісаў за Лукашэнку.

Анатоль Ярмоленка

Сын спявачкі Алесі працягвае творчую дынастыю. Хлопец скончыў каледж мастацтваў у Мінску. У яго была магчымасць вучыцца ў Венскай кансерваторыі (сям’я пэўны час жыла ў Аўстрыі), але, як расказваў Ярмоленка-старэйшы, Анатоль вельмі хацеў вярнуцца на радзіму.

Фота з Facebook

Анатоль з 4 год на сцэне. Удзельнічаў у «Славянскім базары» і «Новай хвалі». Пад псеўданімам DJ Анатоль запісвае сольныя альбомы і выпускае кліпы. А таксама выступае з дзедам у складзе ансамбля «Сябры».

Анатоль спрабаваў прабіцца і ў расійскі шоў-бізнэс — удзельнічаў у конкурсе «Песні» на канале ТНТ.

Фота з Facebook

У вольны час хлопец любіць гуляць у пейнтбол і плаваць у басейне, захапляецца фатаграфіяй.

Яўген Хаменка

Сын лідара гурта «Палац» Алега Хаменкі не стаў звязваць жыццё з музыкай. Скончыў Мінскі каледж прадпрымальніцтва па спецыяльнасці «банкаўская справа», пасля вучыўся на эканаміста ў Мінскім інавацыйным універсітэце.

Фота з асабістага архіва

«Працаваў нейкі час у банку, рэкламным агенцтве. Цяпер з’яўляюся кантэнт-менеджарам у беларускай ІТ-кампаніі SoftSwiss», — расказаў Яўген «Нашай Ніне».

У 16 год ён быў вядоўцам і аўтарам праграмы «К-гульні» на «Восьмым канале», але больш на тэлебачанні не з’яўляўся.

«Я ўвесь час захапляўся пісьменніцтвам, хацеў выдаць кнігу. Цікаўлюся відэагульнямі і настолкамі», — дзеліцца Яўген.

Цяпер ён якраз удзельнічае ў стварэнні некалькіх гульняў. Плануецца, што гэтыя настолка і відэагульня выйдуць у наступным годзе.

Уладзімір і Клім Кацянёвы

У тэлевядучай Святланы Бароўскай і акцёра Анатоля Кацянёва двое дарослых сыноў.

Старэйшы Уладзімір скончыў аддзяленне філасофіі ў БДУ. Паступаў туды дзеля адукацыі, а не працоўнай спецыяльнасці.

Уладзімір Кацянёў. Фота са старонкі «УКантакце»

«Як тыповы гуманітарый з мемаў, я рознае пераспрабаваў: працаваў і бармэнам, і дастаўшчыкам ежы. У нейкі момант кар’ерная эвалюцыя пайшла ў патрэбным кірунку, я прайшоў шлях ад менеджара праектаў у PR-агенцтве да курсаў лічбавага дызайну.

Працаваў у дызайн-студыі, вярстаў жаночы часопіс, цяпер раблю айдэнтыку, сайты, прэзентацыі, рэкламу. Не люблю слова фрылансер — ад яго павявае беднасцю і лянотай. Кажу, што ў мяне прыватная практыка», — падзяліўся хлопец.

У дзяцінстве ён часта чуў ад атачэння: «Ты так падобны да таты, дакладна будзеш акцёрам!» Але сам не марыў пра гэту прафесію.

«Калі вырас — зразумеў, што праца з камерай патрабуе сапраўднага таленту і прызвання. Першага ў мяне малавата, другога — няма зусім, дый жадання ва ўсвядомленым узросце нават не ўзнікала».

У вольны час Уладзімір шпацыруе па 10-15 км і слухае інтэрв’ю і падкасты.

«Асобнае месца ў спісе хобі займае камерны хор «Салютарыс», у якім я спяваю ўжо год 8. Мы аб’ездзілі палову зямнога шара, выйгралі шмат конкурсаў. Гэта пры тым, што хор аматарскі», — дадаў ён.

Малодшы Клім заканчвае факультэт міжкультурных камунікацый Мінскага дзяржаўнага лінгвістычнага ўніверсітэта.

Клім Кацянёў. Фота са старонкі «УКантакце»

«Вырашыў пайсці туды, паколькі мне падабалася ангельская мова. Цяпер няма пастаяннага месца працы, але меўся вопыт у якасці дзіцячага аніматара, перакладчыка», — расказаў Клім.

Хлопец любіць спорт — займаецца ў трэнажорнай зале і гуляе ў баскетбол.

Дар’я і Мікіта Ялінскія

Гэта старэйшыя дзеці Анжалікі Агурбаш.

22-гадовы Мікіта вучыўся у лонданскім каледжы, пасля — ва ўніверсітэце Баконі ў Мілане, на факультэце міжнароднай эканомікі і фінансаў.

Цяпер жыве ў Мілане і працуе кансультантам у швейцарскай кампаніі, якая пастаўляе прамысловае абсталяванне. Дагэтуль быў звязаны з кампаніяй SkyWay — рэдагаваў для іх навуковыя артыкулы і арганізоўваў канферэнцыі.

Дар’я таксама вучылася ў Лондане. Цяпер ёй 32, жыве ў Маскве.

Пайшла ў музычны бізнэс — піша песні, трымае вакальную школу, працуе на канцэртах. Захапляецца індыйскай культурай і спявае мантры.

Наталля Лубнеўская

каментаваць

Націсканьне кнопкі «Дадаць каментар» азначае згоду з рэкамендацыямі па абмеркаванні