На хвалі рэвалюцыі ў Іране ўзмацніліся пратэсты мясцовых жанчын супраць абавязковага нашэння хіджаба. Пад хэштэгам #MyStealthyFreedom (мая тайная свабода) у сацсетках з’яўляецца ўсё больш заклікаў пратэставаць супраць строгіх правіл дрэс-коду.
Галоўным сімвалам гэтых пратэстаў стала дзяўчына з белым сцягам, якая выйшла на антыўрадавы пратэст у Тэгеране. Відэа з яе смелым жэстам з’явілася ў твітары былога мусульманіна, аўтара кнігі «Чаму бога няма» Арміна Навабі. Людзі адразу пачалі рэпосціць яго і адзначаць, што гэтая жанчына — сапраўдная гераіня. На аснове скрыншота з відэа стварылі выяву, якую цяпер рэпосцяць усе неабыякавыя да таго, што адбываецца ў краіне.
«Гэты вобраз (які я прапаную вам перадрукоўваць) з'яўляецца новым сімвалам пратэсту, які праходзіць у Іране. Тысячы людзей выходзяць на вуліцы, каб у тым ліку даць жанчынам права выбіраць, насіць чадру ці не. Гэтая дзяўчына выйшла на плошчу з распушчанымі валасамі ды белым сцягам і стала сапраўдным сімвалам пратэсту супраць прымусовай заслоны. 28 снежня яна была арыштаваная», — напісаў у сваім інстаграме журналіст Раберта Савіяна.
Грамадская актыўнасць прывяла да першых вынікаў: у канцы снежня стала вядома, што паліцыя Тэгерана больш не будзе арыштоўваць жанчын за невыкананне імі ісламскага дрэс-коду. Замест гэтага парушальніцы будуць наведваць заняткі, якія праводзяцца супрацоўнікамі правапарадку. У Тэгеране існуе больш за 100 кансультацыйных цэнтраў для выканання патрабаванняў, звязаных з дрэс-кодам. Між тым за паўторнае парушэнне жанчыны могуць сутыкнуцца з судовымі пазовамі. Праўда, за межамі Тэгерана строгія правілы нашэння адзення працягваюць дзейнічаць.
Нагадаем, у выніку перамогі ісламскай рэвалюцыі ў 1979 годзе іранскія жанчыны былі вымушаныя пакрываць галаву. Гэта стала законам, за невыкананне якога праваахоўныя органы мелі поўнае права арыштаваць парушальніцу.
Першая хваля пратэстаў супраць такіх строгіх правіл пачалася ў 2012 годзе. Тады арганізацыя «Iranian Liberal Students and Graduates» («Іранскія ліберальныя студэнты і выпускнікі») распачала ў фэйсбуку кампанію, мэтай якой было сказаць «не» абавязковаму нашэнню хіджабаў. Пазней у краіне стартаваў буйны флэшмоб, у рамках якога тысячы жанчын фатаграфаваліся без галаўнога ўбору і выкладвалі здымкі ў групу «My Stealthy Freedom».
Nina.nn.by